ପୁଲୱାମା ଆତଙ୍କବାଦୀ ହମଲାରେ ସହିଦ ହୋଇଥିବା ଦୁଇ ଓଡ଼ିଆ ଯବାନଙ୍କ ପାର୍ଥିବ ଶରୀର ଭୁବନେଶ୍ୱର ବିମାନବନ୍ଦରରେ ପହଞ୍ଚିଛି । ବିମାନବନ୍ଦରରେ ଶୋକାକୂଳ ପରିବେଶ ଥିବା ଦେଖିବାକୁ ମିଳିଛି । ସମସ୍ତଙ୍କ ଆଖିରେ ଲୁହ ଓ କୋହ ଭରି ହୋଇ ରହିଛି । ସହିଦ ଓଡ଼ିଆ ପୁଅ ପ୍ରସନ୍ନ ସାହୁ ଏବଂ ମନୋଜ ବେହେରାଙ୍କ ପରିବାର ତାଙ୍କୁ ମରଶରୀରକୁ ଦେଖିବା ପାଇଁ ଚାହିଁ ରହିଥିଲେ । ବିମାନବନ୍ଦରରେ 2 ସହିଦଙ୍କୁ ଗାର୍ଡ ଅଫ୍ ଅନର ଦିଆଯାଇଛି । ତେବେ ଦୁଇ ସହିଦଙ୍କ ଶେଷ କୃତ୍ୟ ସେମାନଙ୍କ ଗାଁରେ ହେବ ବୋଲି ଜଣାପଡ଼ିଛି । ମନୋଜଙ୍କ ଶେଷକୃତ୍ୟ ତାଙ୍କ ଗାଁ ନିଆଳିରେ ହେବାକୁ ଥିବା ବେଳେ ପ୍ରସନ୍ନଙ୍କ ଶେଷକୃତ୍ୟ ଜଗତସିଂହପୁର ଶିଖରେ ଗାଁରେ ହେବ ବୋଲି ଜଣାପଡ଼ିଛି । ବିମାନବନ୍ଦରରେ ଶ୍ରଦ୍ଧାଞ୍ଜଳି କାର୍ଯ୍ୟକ୍ରମ ପରେ ପାର୍ଥିବ ଶରୀରକୁ ସେମାନଙ୍କ ଗାଁକୁ ପଠାଯିବ ।
ଦୁଇ ସହିଦଙ୍କ ପାଇଁ କେବଳ ତାଙ୍କ ପରିବାର ଲୋକ ନୁହଁନ୍ତି ସାରା ରାଜ୍ୟ ଆଜି କାନ୍ଦୁଛି । ବିମାନ ବନ୍ଦରରେ ମଧ୍ୟ ତାଙ୍କ ପରିବାର ଲୋକଙ୍କ ବ୍ୟତୀତ ହଜାର ହଜାର ଲୋକ ତାଙ୍କ ଶେଷ ଦର୍ଶନ ପାଇଁ ଚାହିଁ ରହିଛନ୍ତି ।
ସହିଦଙ୍କ ପରିବାକୁ ରାଜ୍ୟ ସରକାରଙ୍କ ପକ୍ଷରୁ 25 ଲକ୍ଷ ଟଙ୍କା ଲେଖାଏଁ ସହାୟତା ରାଶି ଦେବାକୁ ଘୋଷଣା କରାଯାଇଛି । ଏନେଇ ମୁଖ୍ୟମନ୍ତ୍ରୀ ନବୀନ ପଟ୍ଟନାୟକ ମଧ୍ୟ ସୂଚନା ଦେଇଛନ୍ତି । ଖାଲି ସେତିକି ନୁହେଁ ସହିଦଙ୍କ ପିଲାଙ୍କ ପାଠ ପଢା ଖର୍ଚ୍ଚ ମଧ୍ୟ ରାଜ୍ୟ ସରକାର ବହନ କରିବେ ବୋଲି ମୁଖ୍ୟମନ୍ତ୍ରୀ ଘୋଷଣା କରିଛନ୍ତି । ସେହିପରି ସହିଦଙ୍କ ଗାଁକୁ ଆଦର୍ଶ ପଞ୍ଚାୟତର ମାନ୍ୟତା ଦିଆଯିବ ବୋଲି ମଧ୍ୟ କୁହାଯାଇଛି ।
